Çərşənbə axşamı, 12 Mart 2019 12:13

Əlcəzairdə xalq prezidentə qalib gəldi - VİDEO

Yazan

Əlcəzairin dövlət başçısı 82 yaşlı Əbdüləziz Buteflika prezident seçkilərinin təxirə salındığını və 5-ci dövr namizədliyini geri götürdüyünü açıqlayıb.

Əlcəzair xalqı ayağa qalxıb və təaqüdçü prezidentin istefaya getməsini tələb edib. Xalqın ardıcıl etirazı öz bəhrəsini verib. 

Əlcəzairdə prezident seçkilərinin 18 apreldə keçirilməsi nəzərdə tutulurdu. Ölkənin Prezident Aparatı açıqlayıb ki, qısa müddət ərzində hökumət reviziyaya gedəcək.

Pashinian Qarabağda Ermənistan təhlükəsizlik şurasının iclasını keçirir

Ermənistanın baş naziri Nikol Pashinian martın 11-də Dağlıq Qarabağa gəlib. O Ermənistan Respublikası təhlükəsizlik şurasının burada keçirilən iclasında iştirak etməlidir.

Bu barədə məlumatı Ermənistan hökumətinin mətbuat xidmətinə istinadən AzadlıqRadiosunun Erməni xidməti – Azatutyun yayıb.

Bu iclasda habelə separatçı Dağlıq Qarabağ rejiminin başçısı Bako Saakian iştirak edəcək.

Azatutyun yazır ki, hökumət bu iclas barədə əlavə məlumat verıləcəyini bildirib.

Bu da qeyd olunur ki, Ermənistan baş nazirinin bu iclası niyə Qarabağda keçirməsi məlum deyil.

Saakianın sözçüsü David Babayan deyib ki, bu barədə məlumat təhlükəsizlik şurasının iclasından sonra veriləcək.

“Düşünməyin ki, o gəlirsə, deməli nəsə mühüm bir şey baş verib. Yox. Bu işçi səfərdir. Bu səfərdən məqsəd hansısa qeyri-adi məsələlər, deyək ki, böhran problemləri ilə bağlı deyil”.

Azatutyun saytı yazır ki, baş nazirin bu səfəri zamanı ATƏT-in Minsk Qrupunun son bəyanatının müzakirə olunması gözləniləndir.

Bu bəyanatda həmsədrlər tərəfləri danışıqlar formatına digər tərəfin razılığı olmadan hər hansı dəyişikliyin edilməsinə çağıran bəyanatlar verməməyi tövsiyə ediblər.

Bu da bəllidir ki, Ermənistan baş naziri vəzifəyə gəldiyi ilk gündən Dağlıq Qarabağın danışqılar prosesinə qoşulmasına çağırıb və bunun hətta mövcud formatda nəzərdə tutulduğunu iddia edib.

Məhz buna görə də rəsmi Bakı Minsk qrupu həmsədrlərinin son çağırışının Paşinyanın bəyanatları ilə bağlı olduğunu bildirir.

Azatutyunun yazdığına görə Dağlıq Qarabağda ATƏT-in Minsk qrupu həmsədrlərinin bəyanatına birmənalı baxmırlar.

Saakianın mətbuat katibi Azatutyuna deyib ki, sözü gedən bəyanatda Dağlıq Qarabağın danışıqlarda iştirak etməli olmadığı barədə heç nə deyilməyib və söhbət yalnız formatın dəyişməz olduğundan gedib:

“Buna görə də söhbət formata dəyişiklik edilməsinin yolverilməzliyindən gedəndə biz bununla razılaşırıq. Amma Azərbaycan deyir ki, məsələn Türkiyə həmsədr ölkə olsun, Fransa isə həmsədrlikdən getsin, onun yerinə başqa ölkə gəlsin. Bax bu yolverilməzdir”.

Xatırlatma

ATƏT-in Minsk Qrupunun həmsədrlərinin bəyanatı ilə bağlı Azərbaycan Xarici İşlər Naziriyinin (XİN) mətbuat katibi açıqlama yaymışdı.

Açıqlamada qeyd olunurdu ki, Minsk Qrupu həmsədrlərinin bu açıqlaması Ermənistana verilən bir siqnaldır:

“Biz bunu alqışlayırıq. Prezident İlham Əliyev Minsk Qrupunun həmsədrlərini qəbul edərkən ölkəmizin bu səpkidə mövqeyini həmsədrlərin diqqətinə çatdırmışdı. Münaqişənin həlli üzrə danışıqlar Ermənistan və Azərbaycan arasında aparılır. Danışıqların formatı dəyişilməz olaraq qalır. Ölkəmizin işğal edimiş ərazilərində yaradılmış qondarma rejimin danışıqlara cəlb edilməsi və formatın dəyişdirilməsi cəhdləri qəbuledilməzdir”.

Azad Həsənov məhkəmədə polisə: “Gözünün içinə qədər yalan danışırsan”

Siyasi mühacir statusuyla Litvada yaşayan, ötən il oktyabrın 11-də ağır vəziyyətdə olan atasına görə Bakıya gələndən dərhal sonra həbs olunan Müsavat fəalı Azad Həsənovun işi üzrə məhkəmə istintaqı başlayıb.

Martın 11-də Bakı Ağır Cinayətlər Məhkəməsində hakim İradə Həsənzadənin sədrliyilə keçirilən məhkəmədə A.Həsənov bildirib ki, ona qarşı irəli sürülmüş ittiham tam yalandır, cibinə narkotiki Bakı şəhər Baş Polis İdarəsinin əməkdaşları atıblar.

Öncə prokuror Pərviz Rzayev ittiham aktını elan edib. İttihamda yazılıb ki, A.Həsənov atasının yaşadığı Hövsan qəsəbəsində 2018-ci il oktyabrın 11-də Bakı Şəhər Baş Polis İdarəsinin əməkdaşları tərəfindən saxlanılıb. Baxış zamanı onun üzərindən 3,5 qram heroin tapılıb.

İttihamda yazılanların yalan olduğunu vurğulayan A.Həsənov Bakıya gələn kimi həbs olunmasından danışıb. Bildirib ki, 2014-cü ildən həyat yoldaşı və 6 yaşlı oğlu ilə Vilnüs şəhərində yaşayırdı: “2018-ci il oktyabrın 10-da “Skype” vasitəsilə evimizlə danışanda gördüm ki, atamın vəziyyəti çox pisdir. Atam onkoloji xəstədir, ayağını kəsiblər, sonra infarkt keçirib. Gördüm ki, ölüm ayağındadır. Anam öləndə də onun yasına gələ bilməmişdim. Fikirləşdim ki, atamı sağ ikən görməyə çatmasam da, heç olmasa, dəfnində iştirak edərəm. Dərhal qərar verib yola düşdüm, oktyabrın 11-də səhər tezdən saat 5-in yarısında təyyarə ilə Bakıya çatdım. Atamla görüşdüm, xəstə dayıma baş çəkdim, günorta namazına getdim, anamın qəbrini ziyarət etdim. Həmin gün günortadan sonra böyük qardaşım mənə zəng eləyib dedi ki, “səni axtarırlar, deyəsən, həbs eləmək istəyirlər, pasportunu götür, tez çıx get”. Az sonra bir maşın gəldi, içindən 4-5 nəfər düşüb məni tutdular, zorla maşına mindirdilər”.

Hövsandan birbaşa Bakı şəhər Baş Polis İdarəsinə gətirildiyini, orada qandallı vəziyyətdə saxlandığını deyən A.Həsənov ehtimal edir ki, idarənin qarşısında onun əllərini burub, başını aşağı əyəndə cibinə narkotiki atıblar: “Mənim heç xəbərim olmayıb. Əgər məndə əvvəldən narkotik olsaydı, idarədə məni ayaqyoluna aparanda orada çıxarıb atardım”.

A.Həsənov deyir ki, heç vaxt narkotik görməyib, heç siqaret də çəkə bilmir. Narkotiki qəbiristanlıqdan tapıb özündə saxlaması barədə ifadəsində yazılanlar da yalandır: “İdarədə mənə dedilər ki, narkotikin sənə məxsus olduğunu boynuna almalısan. Mənə psixoloji təzyiq etdilər. Döyülməmək üçün, xəstə atamın narahat olmaması üçün onların yazdığı izahatı imzaladım. Dedilər ki, “özün qol çəksən, cəzan yüngül olar”. Fikirləşdim ki, 30 sutka-zad verərlər, atam, ailəm də narahat olmaz. Həm də başımın üstündə dayananlar dedilər ki, burada izahata qol çəkməmək söhbəti olmur. Xətai məhkəməsində mənim haqqımda həbs qərarı veriləndə məhkəmədə də bunları demişdim, amma protokola salmayıblar. Bir balaca vicdan olsa, bu ittihamın yalan olduğunu sübut etmək 5 dəqiqəlik işdir. Amma mən 5 aydır həbsdəyəm. Bunu heç kimə bağışlamayacağam...”

A.Həsənov bildirib ki, 19 yaşından Müsavat Partiyasının üzvüdür, həmişə müxalifətin keçirdiyi etiraz aksiyalarında iştirak edib. Onun sözlərinə görə, 2014-cü ildə cinayət təqibinə məruz qaldığına görə ailəsilə birlikdə ölkəni tərk etmək məcburiyyətində qalıb: “Yaşadığım Hövsan qəsəbəsində də sosial tələblərlə aksiyalarda iştirak etmişəm. Suraxanı Rayon İcra Hakimiyyətinin Hövsan qəsəbəsi üzrə icra nümayəndəsi mənim barəmdə xüsusi ittiham qaydasında məhkəməyə şikayət verib, həbsimi tələb edirdi. Səbəb də o idi ki, Hövsanda məktəb direktoruna qarşı valideynlərin aksiyası keçiriləndə valideynlərlə yanaşı, mən də jurnalistlərə müsahibə vermişdim. Demişdim ki, direktorun döyülməsi polisin özünün təxribatıdır. O vaxt direktor uşağı döymüşdü, valideynlər də buna etiraz etmək məqsədilə qəsəbənin mərkəzinə toplaşmışdılar. Həmin vaxt polislər direktoru qorumaq əvəzinə, onu gətirib valideynlərin arasına saldı. Hesab edirəm ki, bu da bilərəkdən, təxribat məqsədilə edilmişdi”. (edited)

Daha sonra məhkəmədə Bakı şəhər Baş Polis İdarəsinin Narkotiklərə Qarşı Mübarizə şöbəsinin baş leytenantı Elvin Kazımov ifadə verib. O bildirib ki, Azad adlı şəxsin narkotiklərin qanunsuz dövriyyəsilə məşğul olması barədə əməliyyat məlumatı əsasında əməliyyat keçirib, A.Həsənovu həbs ediblər. Onun sözlərinə görə, idarəyə gətirəndən sonra A.Həsənov özü cibindəki üç büküm heroini çıxarıb stolun üstünə qoyub: “Cibindən telefonunu, pul kisəsini və bükümləri çıxartdı. Pul kisəsində avrolar vardı. Dedi ki, qəbiristanlıqdan tapmışam. Ona heç bir fiziki, psixoloji təzyiq olmayıb”.

Vəkil Osman Kazımov polisin nəzərinə çatdırıb ki, A.Həsənov həmin gün Azərbaycana gəlmişdi, onun narkotiklərin qanunsuz dövriyyəsilə məşğul olması barədə məlumat inandırıcı deyil. Vəkil soruşub ki, əgər bu adamın narkotik dövriyyəsilə məşğul olması haqda məlumat vardısa, bəs niyə evlərində də axtarış aparılmayıb? Polis bu suala “ehtiyac görmədik” cavabını verib.

A.Həsənov isə polis əməkdaşının bütün söylədiklərinin yalan olduğunu bildirib: “Gözünün işinə qədər yalan danışırsan. Yalan danışanın əzizləri, anası, bacısı, arvadı ən alçaq adamlardır, qane eləyir səni?”

Məhkəmə prosesi martın 18-nə qədər təxirə salınıb.

A.Həsənov 2018-ci il oktyabrın 11-də həbs olunub. O, Cinayət Məcəlləsinin 234.4.3-cü (külli miqdarda narkotik maddə əldə etmə, daşıma və ya saxlama satış məqsədilə olduqda) maddəsilə ittiham olunur.

Bu maddənin sanksiyasında 5 ildən 12 ilə qədər azadlıqdan məhrumetmə cəzası var.

Gənc xoreoqraf Şəhriyar Cəfərov müdafiə naziri Zakir Həsənova açıq məktub ünvanlayıb.

Xeberinfo.de Ş.Səfərovun nazirə məktubunu təqdim edir:

“Mən Şəhriyar Cəfərov 2011-ci ildən Müdafiə Nazirliyi Həzi Aslanov adına Zabitlər Evində ansanbulun xoreoqraf, məşqci, pedaqoq vəzifəsində işləmişəm. 2018-ci ilin noyabr ayında ştatım ləvğ olunur. Qanuna görə rəsmi olaraq iki ay əvvəldən xəbərdarlıq edilməliydi. Heç bir xəbərdarlıq olmadan ixtisar olundum. Başqa ştatla təmin olunmağımı istəsəm də, razılaşmadılar. Anam ankoloji xəstə idi və 04.01.2019-cu il tarixdə vəfat etdi.

Ansanbulun rəqs qrupunun xoreoqrafi, baletmeystri ştatı olmadan rəqs ifaçıları necə idarə oluna bilər? Bir orkestrin dirijoru olmadan idarə oluna bilərmi? Bu sualım hələ də cavabsız qalır. Hələ də ansanbulun Baletmeystr və Xoreoqrafi yoxdur.

2019-cu ilin yanvar ayında ştatın adı dəyişdirilib - Rəqs üzrə repetitor. Amma vəzifə olaraq, eyniliklə həmin ştata heç bir xoreoqrafiya təhsili olmayan birini təyin ediblər.

Mən Rusiyada təhsil almışam, SSRİ-nin Xalq artisti Mahmud Esambayevin yeganə azərbaycanlı tələbəsiyəm (1984-1986). Ali təhsilli xoreoqraf-rəqqasam. Beynəlxalq müsabiqələr lauriyatiyam. Azərbaycanda Xocalı və 20 Yanvar mövzusuna xoreoqrafik qurluşlar edən ilk xoreoqrafam. Bu quruluşlar Azərbaycan dövlət televiziyasında təqdim olunub və arxivdə qorunur. Hərbi ansanbulda işlədiyim dövrdə rəhbərlik tərəfindən dəfələrlə fəxri fərmanlarla mükafatlandırılmışam.

Ansanbulun repertuarında quruluş verdiyim rəqslər və xoreoqrafik kompozisiyalar indi də ifa olunur. Dəfələrlə yuxarı komandanlığın qəbuluna yazılsam da, qəbul baş tutmayıb.

Cənab nazir, mənə və sənətimə qarşı olan haqsızlığa aydınlıq gətirilməsini, bu yaranmış problemin araşdırılmasını sizdən xahiş edirem“.

Əbuzər İbrahimi Türkmən: “Ali lider Ayətullah Xameneinin Azərbaycanla bağlı mövqeyi bundan ibarət olub ki, biz həmişə Azərbaycanı müdafiə edəcəyik, necəki keçmişdə müdafiə etmişik”

Ermənistan baş naziri Paşinyanın İrana səfəri və ondan sonra baş verənlər müzakirə olunmaqda davam edir. Xatırladaq ki, ötən gün İran XİN və daha sonra İranın Azərbaycandakı səfirliyi ötən həftə baş verənlərə münasibət bildirib və Tehranda ermənilərlə Paşinyanın görüşündə qaldırılan şüarlar qınanıb. Bu dəfə prosesə İranın ali dini liderinin ən yaxın adamlarından biri qoşulub.
İranın İslam Əlaqələri və Mədəniyyəti Təşkilatının sədri Əbuzər İbrahimi Türkmən Azərbaycanla bağlı bəyanatla çıxış edib. Əslən azərbaycanlı olan Türkmən İran ali dini liderinin Azərbaycana münasibətini açıqlayıb.

Sitat: “Bildiyim kimi ali lider Ayətullah Xameneinin Azərbaycanla bağlı mövqeyi bundan ibarət olub ki, biz həmişə Azərbaycanı müdafiə edəcəyik, necəki keçmişdə müdafiə etmişik. Ali lider Azərbaycanı daima dəstəkləyib. Bundan sonra da bu siyasət Ali lider tərəfindən davam etdiriləcək”.

İran dövlət rəsmisi keçirdiyi mətbuat konfransında Ermənistan baş nazirinin Tehran səfəri və İran rəhbərliyinin Azərbaycanla bağlı mövqeyinə münasibət bildirib. Türkmən deyib ki, İslam İnqilabının rəhbəri həmişə Azərbaycan dövləti və xalqının müdafiəçisi olub və indi də belədir: “Son günlərdə Azərbaycan xalqını narahat edən vəziyyət baş verib. Mən qeyd etməliyəm ki, Azərbaycan regionda bizim üçün mühüm ölkədir. Bizim 15 qonşumuz var, bu ölkə onların ən vaciblərindəndir”, deyə o bildirib.
Azərbaycan – İran əlaqələrində ixtilaf yaradan istənilən hər bir addımın qəbuledilməz olduğunu deyən Ə.İ. Türkmən vurğulayıb:
“Son günlərdə deyilən bəzi şüarlar İran İslam Respublikasının mövqeyi deyil. İran İslam Respublikasının mövqeyi rəsmi tribunalardan bildirilir. Biz həmişə Azərbaycan xalqının hüquqlarını müdafiə etmişik”.

Sabah (06.03.2019) Şərqdə ilk demokratik respublikanın - Azərbycan Xalq Cümhuriyyətinin qurucularından olan Məhəmməd Əmin Rəsulzadənin anım günüdür.

M.Ə.Rəsulzadə 1884-cü il yanvarın 31-də Bakının Novxanı kəndində anadan olub.

Gənc yaşlarında sosial demokratlarla birgə «Hümmət» təşkilatının yaranmasında iştirak edib. Çarizmin təqiblərinə məruz qalaraq 1909-cu ildə İrana mühacirət edən Rəsulzadə bir müddət burada “İrane-nou” qəzetinin baş redaktoru kimi çalışıb, məşrutə inqilabı yatırıldıqdan sonra Türkiyəyə mühacirət edib.

O, 1911-ci ildə Müsavat Partiyasına üzv qəbul edilib və 4 il sonra Müsavat Partiyası Mərkəzi Komitəsinin sədri seçilib. 1918-ci ildə Fətəli Xan Xoyski və digərləri ilə birlikdə Şərqdə ilk respublikanın yaradılmasını rəsmi şəkildə elan edib. 1920-ci il aprelin 28-də bolşevik işğalından sonra həbs edilib. Az sonra Stalinin göstərişi ilə həbsdən azad edilərək Moskvaya aparılıb. O, Stalinin təkidlərinə baxmayaraq, Sovet hakimiyyəti ilə əməkdaşlıqdan imtina edərək SSRİ-ni tərk edib.

M.Ə.Rəsulzadə 1955-ci il martın 6-da Ankarada dünyasını dəyişib və Əsri məzarlığında dəfn edilib.

Qeyd edək ki, 1992-ci il dekabrın 24-də Azərbaycan prezidenti Əbülfəz Elçibəy "Görkəmli ictimai-siyasi xadim Məhəmməd Əmin Rəsulzadənin totalitar sovet rejimi dövründə repressiyaya məruz qalmış ailə üzvlərinin Azərbaycana qaytarılması və onların sosial-məişət məsələlərinin həlli haqqında" sərəncam imzalayıb.

29 dekabr 1993-cü ildə Azərbaycan prezidenti Heydər Əliyev "Azərbaycanın görkəmli ictimai-siyasi xadimi Məhəmməd Əmin Rəsulzadənin anadan olmasının 110 illik yubileyinin keçirilməsi haqqında" sərəncam imzalayıb.

22 noyabr 2013-cü ildə isə Azərbaycan prezidenti İlham Əliyev Məhəmməd Əmin Rəsulzadənin 130 illik yubileyinin keçirilməsi haqqında sərəncam verib. Sərəncama əsasən, respublikada və respublikadan kənarda silsilə yubiley tədbirləri keçirilib.

Çərşənbə axşamı, 05 Mart 2019 00:50

Gəncə hadisələrinə görə 14 nəfərə hökm oxundu

Yazan

Martın 1-də Bakının Sabunçu Rayon Məhkəməsində 2018-ci ilin iyulunda Gəncədə baş vermiş hadisələr üzrə ittiham olunan iki qrupun barəsində hökm oxunub.

Müttəhimlərin yaxınları “Turan” Agentliyinə bildiriblər ki, Gəncə Şəhər Ağır Cinayətlər Məhkəməsinin hakimi Xaqani Səmodov 2018-c il iyulun 10-da Gəncə Şəhər İcra Hakimiyyətinin binası qarşısında baş vermiş iğtişaşların təşkilində ittiham olunan altı nəfərin barəsində hökmü oxuyub.

Məhkəmə Elman Rüstəmov və Nemət Heydərlini 8, Elvin Allahverdiyev, Elvin Nəzərov və Vüqar Xudiyevi 7, Renat Məmmədovu 6 il azadlıqdan məhrum edib.

Onlar CM-in 220.1-ci maddəsi (kütləvi iğtişaşların təşkili) ilə təqsirli bilinibilər. E.Rüstəmov və N.Heydərli həm də CM-in 315.2-ci maddəsi (polisə müqavimət göstərmək) ilə təqsirli biliniblər.

Həmin gün Sabunçu məhkəməsində başqa prosesdə Gəncə hadisələri üzrə təqsirli bilinən daha 8 nəfərin barəsində hökm oxunub.

E.Quliyev 8, E.Hacıyev 7, C.Əzizov, Q.Nuruzadə, F.Mirzəliyev, S.Rəcəbov, S.Əzizov 6, R.Nuruzadə 5 il azadlıqdan məhrum olunublar. Digər bir neçə qrupun işinə baxılması davam edir.

Məhkəmələr qapalı keçirilib.

Xatırlatma

2018-ci il iyulun 3-də Gəncə şəhərində icra başçısı Elmar Vəliyevə qarşı sui-qəsd törədilib. Əslən Gəncədən olan Yunis Səfərov onu və onun cangüdənini yaralayıb.

Bundan sonra sosial şəbəkələrdə iyulun 10-na Gəncə administrasiyasının qarşısında E.Vəliyevin işinə etiraz olaraq aksiya təyin edilib.

İyulun 10-da axşam DİN Gəncədə iğtişaşlar barədə məlumat yayıb. Hadisələr zamanı iki polis əməkdaşı öldürülüb.

Bunun ardınca dindarlar arasında kütləvi həbslər baş verib. 60-a yaxın adam cinayət məsuliyyətinə cəlb edilib. Silahlı müqavimət zamanı 6 nəfər öldürülüb.

Paşinyanın İran səfəri ilə bağlı bəziləri məsələni yanlış yerə aparırlar, ciddi qarşıdurma yaradan ittihamlar, təhdidlər və sair edirlər. Məsələnin mahiyyəti qalır bir yanda, bunlar kimlərisə Qarabağı satmaqda ittiham edir, Rəhbərə qarşı insanları imansızlıqda suçlayırlar.
Bu səfərdə narazılıq yaradan iki hal var idi - səfərin Xocalı Soyqırımı günlərinə təsadüf etməsi və görüş zalında "Qarabağ Ermənistanındır" şuarı asılması. Biz də bunlara etiraz edir, rəsmi Tehrandan açıqlama istəyirdik. İran Xarici İşlər Nazirliyi də dünən məlum şuarın yanlış olduğunu bildirdi.
Görüşə gəldikdə, heç kim hüquqi və siyasi baxımdan İrandan tələb edə bilməz ki, Ermənistanla əlaqə qurma, gediş-gəliş etmə. Ermənistan işğalçıdır, İran da şiə adını qorumağı iddia edən güclü və tarixi keçmişə malik olan bir dövlətdir. Bizim umacağımız odur ki, heç olmasa matəm günlərimizdə İran bizi matəmə batıran Ermənistana dostcasına sarılmasın. Çoxmu şey istəyirik?!
Dediyimiz kimi, məlum səfər bir neçə gün əvvəl ya sonra olsaydı nə dəyişəcəkdi və yaxud İran nə itirəcəkdi?
Hə, deyirsiniz ki, Azərbaycan İsraillə dostluq edir, İran da Ermənistana qucaq açıb. Bu, çox yanlış məntiqdi və qüsurlu müqayisədir. İsrail rejimi İranı işğal etməyib, vətəndaşlarını qətlə yetirməyib, ermənilər isə bizim hamilə analarımızın qarnından süngü ilə körpəsini parçalayıb çıxarıb. İkincisi, İran deyə bilər ki, İsrail fələstinliləri öldürür, xub. Niyə Fələstində öldürülən sünni müsəlman İran üçün çoox əzizdir, Qarabağda öldürülən şiə müsəlmanın heç xətri yoxdu? Hətta siyasi inadkarlıq edib qatil rejimin başçısını təntənə ilə qarşılayır?
Qardaşım, biz deyirik ki, Xocalı harayımıza hörmət edin, çoxmu şey deyirik? Siz isə bizi İran İslam Respublikasının ali dini liderinə (Rəhbərə) qarşı fəsad etməkdə suçlayırsız. Bu məsələdə həqiqətən fəsad varsa, fasidləri İran hökumətində axtarmalısız. Çünki səfərin təşkilatçısı sizsiniz, hadisələr də İranda baş verib.
Sonuncusu, Azərbaycan-İsrail münasibətləri ilə İran-Ermənistan münasibətləri eyni deyil. Azərbaycan neftini İsrailə satır, İsrail də Azərbaycanı əlaltısı edib, qarşılıqlı tərəfdaş kimi deyil, qulluğa göndərəcəyi zəif və çarəsiz uşaq kimi baxır. Bunun səbəbləri başqadır. Azərbaycan hökuməti yanlış edir, dövləti təslimçi vəziyyətə salır, tam başqa mövzudu. Lakin deməliyəm ki, İsraillə dostluq edən hökuməti iqtidara elə İran gətirib. Heydər Əliyev Naxçıvanda İran nümayəndələri ilə separat danışıqlara gedib, İranın uçağı ilə Bakıya gəlmişdi.
Əlqərəz, məsələləri qarışdırmayın, cənablar! Çox şükür ki, İran xeyli inkişaf edib, zəngin dövlətçilik tarixi var, regionda güc sahibidir. Azərbaycanın durumu ortada. Əgər İran Azərbaycan-İsrail münasibətlərinə adekvat cavab vermək məqsədilə belə edirsə, sizcə, düz edir?
Ən sonda bildirim ki, məni bu düşüncəmə görə heç kim ittiham edə bilməz. Çünki mən Rəhbərin müqəllidiyəm, bütün dünyamı və axirətimi Rəhbərin şərii qərarlarına etibar edirəm.

Cavid Cabbarlı

“Ararat” idman kompleksində  erməni dilində bir neçə plakatın asılması özbaşına və qəbuledilməz bir addım idi, İran İslam Respublikası bunu dəstəkləmir.

Bunu ONA-nın Tehran müxbirinə eksklüziv açıqlamasında İran Xarici İşlər Nazirliyinin sözçüsü Bəhram Qasimi bildirib.

B.Qasimi deyib ki, Ermənistan  baş naziri Nikol Paşinyanın “Ararat” idman kompleksində  olması və İranda yaşayan eyni dinə mənsub vətəndaşlarla görüşü normal haldır: “Lakin Ararat idman kompleksində Dağlıq Qarabağ münaqişəsinə dair erməni dilində bir neçə  plakatın asılması  özbaşına atılmış bir addımdır, qəbuledilməzdir ”

İran Xarici İşlər Nazirliyinin sözçüsü İranın Qarabağ münaqişəsinə dair  siyasətinin həmişəki kimi şəfaf və aydın siyasət olduğunu, dəyişmədiyini vurğulayıb: “Münaqişə beynəlxalq prinsiplər əsasında və danışıq yolu ilə həll edilməlidir. İran üçün Ermənistan və Azərbaycanla  münasibətlərinin  Qarabağ münaqişəsinin təsiri altında olmaması çox önəmlidir.  Ona görə  İran bu məsələdə  öz əsaslı və məntiqli siyasətini davam etdirir.  Ümid edirik ki,  münaqişə sülhməramlı səylərlə diplomatik yollarla tez bir zamanda həll ediləcək. İran iki ölkə arasındakı bu münaqişənin dinc yolla həlli üçün çalışıb,  yenə də, bunun  üçün bütün səylərini göstərə bilər”.

B. Qasımi qeyd edib ki, uzun əsrlərdən bəri, müxtəlif ilahi din mənsubları,  o cümlədən ermənilərin İranda dinc yaşadığına görə fəxr edirlər. Onun sözlərinə görə, bu gün də  İran Konstitusiyasına əsasən erməni, zərdüşt və yəhudi icmalarının deputatlar İran parlamentinə  təmsil olunurlar.

Ermənistan baş nazirinin Tehrana son səfərinə münasibət bildirən B. Qasimi İranın bütün qonşularına münasibətdə şəfaf və aydın siyasət yürütdüyünü söyləyib:  “Biz qonşu ölkələrlə  qarşılıqlı ehtiram və  daxili işlərə müdaxilə etmədən əlaqələr qurmaqda maraqlıyıq.   Eyni zamanda  biz münasibətləri daha da genişləndirməyə çalışırıq. Hesab edirik ki,  İranın  qonşu ölkələrdən hər hansı biri ilə münasibətlərinin genişlənməsi    qonşu ölkələr və dünya ölkələri  arasında hansısa ölkənin mənafeyinin əleyhinə deyil və olmayacaq. SSRİ dağılması ilə Orta Asiya və Qafqazda ölkələrin müstəqillik əldə etməsinin ardınca  İran və Ermənistan arasında  qonşuluq haqqı və prinsiplərinə əsasən balanslı və mötədil münasibət qurulub. Ermənistan baş nazirinin İrana səfəri  bu əlaqələr və İranın öz xarici siyasətində bütün şimal qonşu ölkələrlə bağlı yürütdüyü siyasət çərçivəsində baş tutub”.

İran-Azərbaycan münasibətlərini dəyərləndirən B.Qasimi deyib ki, iki qonşu ölkələr müştərək adət-ənənə və mədəniyyətə, məzhəb oxşarlığına malikdir: “Azərbaycan müstəqillik əldə etdikdən sonra  davamlı olaraq münasibətlərimiz yüksələn xətt üzrə  inkişaf edib. Hər iki ölkənin rəsmilərinin diqqəti  əlaqələri müxtəlif sahələrdə daha da inkişaf etdirməyə yönəlib və yönələcək. Son illərdə  müxtəlif  nümayəndə heyətlərinin,  xüsusilə prezidentlər İlham Əliyev və Həsən Ruhaninin, xarici işlər nazirlərinin görüşlərinə, eləcədə əldə olunmuş razılıqlara nəzər salsaq,  Azərbaycan və İran arasında əlaqələrin nə qədər dərin kökləri olduğunu görərik.  İran Azərbaycanın, Ermənistanın  və digər qonşu ölkələrin sabitliyini və iqtisadi inkişafını  dünyanın ən həssas bölgəsi olan regionumuzun inkişafı hesab edir. Bizim istəyimiz qonşu ölkələrin bir-biri ilə düşmənçilikdən uzaq, dinc və təhlükəsiz yaşamasıdır”.

"Görünür, o görüşdə iştirak edən mədəniyyət xadimlərinin siyahısını tutanlar məni nəzərə almayıblar”.

Bu fikirləri açıqlamasında ötən gün prezident İlham Əliyevin mədəniyyət xadimləri ilə görüşünə dəvət olunmamasına münasibət bildirən Xalq artisti Rasim Balayev deyib.

Rasim Balayevin sözlərinə görə, həmin görüşə çağırılmamasının səbəbləri ona da aydın deyil:

"Məni o görüşə dəvət etməmişdilər. Niyə etməmişdilər, bilmirəm. Açığı, bu barədə fikirləşmirəm də… Mənim hökumətlə nə problemim olasıdır ki..? Keçən il "Şərəf” ordeni ilə təltif edilmişəm. O görüşdə iştirak edənlərin necə seçildiyini bilmirəm. Siyahının nazirlikdə, yoxsa Administrasiyada hazırlandığından məlumatım yoxdur. Görünür, o görüşdə iştirak edən mədəniyyət xadimlərinin siyahısını tutanlar məni nəzərə almayıblar”.

9 -dən səhifə 220