2018-ci il 10 iyul Gəncə hadisəsinə görə haqsız olaraq həbs edilmiş Hüseynzadə Elmir Natiq oğlunun ailəsinə göndərdiyi məktubu valideyinləri vetenugrunda.az-a təqdim ediblər. Məktubu olduğu kimi diqqətinizə çatdırırıq: 

"... Mən bir neçə nəfərin eyni istiqamətdə qaçdığını gördüm, nə baş verdiyini anlamadım və qeyri-ixtiyari mən də həmin istiqamətdə 8-9 addım qaçdım, lakin öndə qaçan qara paltarlı bir nəfərin, adı mənə sonra məlum olan Rəşadın, əlində qılınca bənzər bir şey gözümə sataşdı və həmin oğlanın polislər tərəfə qaçdığını gördükdə, onun niyyətinin pis olduğunu anladım və qorxub geri çəkildim, dərhal ordan uzaqlaşdım, camaat arasında gərginlik yaranmağa başladı və bu üzdən də mən evə getməyə tələsdim.

Evə doğru gedəndə, meydanın yaxınlığında olan “Şah Abbas” məscidinin parkında məni iki nəfər mülki geyimli şəxslər saxladı və Nizami RPİ-nə gətirdi. Həmin günü Nizami RPİ-də adam əlindən tərpənməyə yer yox idi, məni və digərlərini, qadın – uşaq fərq qoymadan, hamını polis idarəsinin koridorunda üzü divara, dizi üstə, əlimiz başımızın arxasında saxlayırdılar, aramızda 33-35 yaşında bir qadın yanında 6-7 yaşlı oğlu var idi, qadın ayaq üstə qalxdı və polisə üz tutub dedi ki, mənim ayaqlarım ağrıyır diz üstə dura bilmirəm qoy ayaq üstə durum, qəfldən polis qadını vurdu və alçaldıcı, küçə söyüşlərlə təhqir edərək onu döyməyə başladı. Həmin vaxt mən koridorun orta hissəsində idim, qadının yaxınlığında olan 5-6 nəfər oğlan uşaqları 1-2 nəfər kişi xəylağı ayağa durdular ki, qoymasınlar qadını döyməyə, lakin polis nəfərlərin sayı çox olduğundan bunları da ağızlarından qan gələnə kimi döydülər, uşağın çığırtısı ürək ağrıdırdı, mən qorxu, həyacan və dəhşət içində idim, ürəyim elə çırpınırdı ki, sanki çölə çıxacaqdı, həyatımda belə şeylər görməmişdim, burada qadın – uşaq demir, böyük – kiçik fərq qoymur, hamını amansızcasına döyürdülər.

Bir nəfər 22-23 yaşlı xanım, çox güman ki, müxbir idi, yanında da bir nəfər əlində kamera olan cavan oğlan döyülə-döyülə bizim yanımıza koridora gətirildilər. Xanım başladı polislərə deməyə ki, siz etdikləriniz qanunsuzdur, belə etməyin və sair bu kimi sözlər, həmin an iki əməliyyatçı biri xanıma tərəf o biri isə həmin oğlana tərəf yaxınlaşdı, xanımı təpiklə çox bərk vurdu, elə vurdu ki, xanım qalxıb divara dəyib yerə yıxıldı və qeyri-ixtiyari sidik ifrazı etdi, kafelli döşəməni batırdı, onun işiyib batırmasını polislər lağ edib gülməklərindən mən anladım orada nə baş verdiyini, cavan oğlanın isə başından üzündən var gücləri ilə vururdular, üzü-gözü qan içində idi.

Aradan 10 dəqiqə keçdi bizim hamımızı koridorun sağ tərəfindən sol tərəfinə keçirdilər və yenə həminki qaydada dizi üstə əlimiz başımızın arxasında üzümüz divara sarı düzdülər, təxminən 15-20 dəqiqə keçmişdir, dəqiq xatırlayıram ki, bir Türkiyə vətəndaşı var idi, onu 12-14 nəfər eyni zamanda amansızcasına döyürdülər “abi, abi” deyib lağa qoyaraq söyürdülər, “...nəyə gəlmisən, bura çeviriliş etməyəmi gəlmisən, nə etmək istəyirdin?...” deyə-deyə döyürdülər, o da cavabında “...işimlə bağlı burdayam, ailəmlə gəlmişəm, mənim heç nədən xəbərim yoxdur...” söyləyəndə onu döyənlər sanki daha da azğınlaşıb əvvəlikindən daha da bərk döyürdülər. Koridorun digər tərəfində başqa bir dəhşətli mənzərə var idi: mayor rütbəli, lakin mülki formada bir hərbçini yerdə uzanıqlı vəziyyətdə sillə, yumruqla döyürdülər, döyə-döyə deyirdilər ki, niyə işdə deyilsən, nəyə gəlmisən bura, nə etmək istəyirdin. 

Aradan bir müddət keçdi, lakin bizi dizi üstə yerdə həmin qaydada durmağa məcbur edirdilər, hamımızı ara-sıra döyürdülər, digər koridordan ara-sıra səslər gəlirdi, işgəncə səsləri idi, səslərdən adamı vahimə basırdı, qorxu və dəhşət bürüyürdü. Bir nəfər mülki qeyimdə şəxsə, belə anladım ki, polis işçisinə, telefon zəngi gəldi və o qışqıraraq “...necə yəni öldülər?! bu boyda hazırlıq, bu boyda qüvvə - öldülər nədir?! Bunların var-yoxunu (söyüşlər)...” zəngə atboy verəndən sonra həmin şəxs bizə tərəf dönüb qəzəblə baxdı, sanki gözlərindən od püskürürdü... ağına-bozuna baxmadan hardan gəldi kimi gəldi başladı qəzəblə şiddətli döyməyə, bütün idarədəki polis işçiləri tökülüşdülər, qoşuldular bir-birinə və bizim hamımızı amansızcasına sillə, yumruq, təpik, dəyənəklə başladılar döyməyə. Biz artıq yerdə uzanıqlı vəziyyətdə döyülürdük, mənim özümü 4-5 nəfər eyni zamanda 15-20 dəqiqə döyürdülər, döyülən şəxslərdən bir nəfərin səsini eşitdim: “...niyə vurusunuz məni, ermənisiniz mi döyürsünüz?” bu sözə görə dahada azğınlaşıb vəhşicəsinə döydülər həmin oğlanı, o qədər döydülər ki, onun səsi çıxmadı ancaq ciyilti eşidilirdi, həmin ciyiltinin səsi 3 ay mənim qulağımdan getmirdi.

Artıq gecə olmuşdur, məni və mənimlə birgə 10 nəfər adamı ayırdılar, harasa aparırdılar, idarənin qapısından darvazasına kimi polis nəfərlərdən canlı koridor düzmüşdülər, o koridordan biz keçəndə hər duran polis bizi qəzəblə qəddarlıqla vururdu, kimisi təpiklə, kimisi yumruqla, kimisi dəyənəklə, kimisi radio stansiyanın (rasiyanın) arxasıyla, üstümüzə tüpürürdülər, söyürdülər, bizi 2 Mercedes-Sprinter markalı maşına hər maşına 5 nəfər mindirib Tovuz RPŞ-nə apardılar. Yolda gedərkən bizə oturmağa icazə vermirdilər, döyərək bizi ağzı üstə yerə uzatdılar, Tovuza çatana kimi dəyənəklə, təpiklə, şapalaqla, radio stansiyanın (rasiyanın) arxasıyla vururdular, mənim başımın arxasından o qədər vurdular ki, burnumdan qan açıldı, mən bir təhər çöməldim, bunu görən sürücü polislərə dedi ki, maşının içini qan etməyin, bu zaman polis saçımdan tutaraq, başımı dizimə vurub, burnumun qanını şalvarımın dizinə sürtməyə başladı.

Tovuza çatanda bizi polis şöbəsinin zirzəmisinə saldılar, orada gördüm ki, bizimlə birgə yetkinlik yaşına çatmayan 2 nəfər də gəlmişdi, onlar da döyülmüş halda idilər, üst-başları, üz-gözləri çox pis gündə idi. Zirzəmidə də bizi bir neçə dəfə girib döyüb çıxırdılar. Beləliklə səhər üzümüzə açıldı. Artıq 15-16 saat idi ki, bizə nə yemək nə də su verilmirdir, heç bir tibbi yardım göstərilmirdi, vəziyyətimiz çox pis idi. Səhər bir nəfər gəldi, çox güman ki, müstəntiq idi, yanında da sənəd gəzdirən və yazanlar var idi. Yetkinlik yaşına çatmayan uşaqlardan biri qəfldən titrəyib huşunu itirib yerə yıxıldı, onun üzünə su vurdular, bir təhər ayıltdılar, rəis göstəriş verdi ki, bunlara su alıb versinlər, bundan sonra biz nəhayət ki, su içdik.

Sonra bizi Gəncə Nizami Rayon Məhkəməsinə gətirdilər, mənim barəmdə 20 sutka inzibati həbs qətimkanı seçildi, mənim vəkilim yox idi, dəfələrlə hakimə dedim ki, məni döyüb öldürürdülər, ailəmlə əlaqə saxlamağa şərait yaradılmır, doğmalarım məndən nigarandır məni axtarırlar, saxlandığım yerdə ağzımı açıb nəsə deyən kimi məni söyüb döyürlər, səsimi kəsməsəm öldürməklə hədələyirlər. Mənim döyülmüş bədənim özü öz sözünü deyirdi, hər yerim pis gündə idi, lakin hakim nə dediklərimə nə də gördüklərinə məhəl qoymadı, öz qərarını oxuyub getdi, və məni yenidən Tovuz RPŞ-nə qaytardılar, müvəqqəti saxlanma yerinə saldılar. Saat günorta 4-5 arası idi mən kameraya girəndə, 4 nəfərlik yer idi, mənim bütün bədənim ağrıyır sızıldayırdı, ac və susuz idim, yuxusuz idim, uzandım ki, bir az dincələm, lakin 5 dəqiqə keçməmiş əllərində dəyənək 5-6 nəfər polis işçisi söyüş söyə-söyə içəri daxil oldu, sən demə otaqda video-müşahidə kamerası var və bunlar mənim uzandığımı görüb gəldilər. Mən qorxudan səsimi çıxartmayıb küncə sıxıldım, onlar mənə tərəf gəlirdilər, məni yataqdan qaldırdılar, 5-6 dəfə var gücləri ilə vurdular və saat 22:00-dək uzanmağıma qadağa qoydular, mən qorxumdan dedikləri kimi edirdim.

Səhər saat 8-dən qaldırırdılar axşam saat 22:00-dək uzanmaq olmaz, gün ərzində 10-15 dəqiqə hava almağa çıxarırdılar. İyul ayının 20-də, inzibati cəzanın 10-cu günündə məni qəfldən Gəncəyə apardılar, əvvəlcə Kəpəz RPİ-nin müvəqqəti saxlanma yerinə, 1-2 saatdan sonra isə, təxminən saat 18:00 radələrində Nizami RPİ-nin rəisi Ədalət Sadıxovun otağına gətirdilər, orada 6-7 nəfər mülki qeyimdə işçilər oturmuş idi, rəis mənə video-görüntü nümayiş etdirdi, və orada məni göstərib soruşdu ki, bu sənsən, mən də dedim ki, bəli, ikinci sözü ağzımdan çıxartmağa qoymadı, başladı özü məni döyməyə, sonra göstəriş verdi ki, bunu da onların yanına aparın. Məni işığı zəif olan bir otağa saldılar, içəri daxil olan kimi badalaq vurub yerə yıxdılar, ayağımı, əlimi skoçla bağladılar, gözlərimə paqon qoyub skoçladılar, məni döyməyə başladılar, onlar 8-9 nəfər olardı, ayağımdan çəkələyi çıxarıb oturacaq stola diriyib ayağımın altına dəyənəklə var gücləri ilə vururdular, iki nəfər iri gövdəli adam, kürəyimə çıxıb tapdalayıb əzirdi (mənim cəmi 50-55 kq çəkim var), döyməkdən yorulmurdular, növbə və fasilələrlə 3-4 saat ərzində bizi döyürdülər, həm döyür həm də söyürdülər, təhqir edirdilər, bir anlıq huşum gedib-gəlirdi, nəfəs ala bilmirdim, sonra məni və mənimlə bir qandala vurulmuş Asif Cavadovu Kəpəz RPİ-nin müvəqqəti saxlanma yerinə gətirdilər.

Orada da Asiflə məni iki nəfər, mayor və serjant rütbəli işçilər döyürdülər, gecə yarısı ara-sıra ayrı-ayrı şəxslər otağa daxil olub bizi döyüb gedirdilər. Səhər bizi yenidən Nizami RPİ-nə gətirdilər, 4 nəfər idik Şahin Verdiyev, Mirzə Hüseynov, Asif Cavadov və mən. Orada müstəntiq Orxan Babayev ifadəmi aldı və imzalamağa verdi, oxuyanda gördüm ki, izahatda əlavə olaraq törətmədiyim şeylər qeyd edilib, imza etməkdən imtina etdim, onda gördüm ki, müstəntiq otaqdan çıxdı və otağa iki nəfər mülki qeyimli iri bədənli şəxslər daxil olub üstümə gəldilər, dəhşət məni bürüdü, “...yenə döyəcəklər...” düşündüm və onlar doğurdan da məni top kimi ora-bura çırparaq amansızcasına döydülər, ağzım-burnum qan içində idi, ayaq yoluna apardılar ki, üzümü yumağa, lakin orada da məni döydülər, başımı rakovinaya vura-vura, yumruq, təpik, sillə vurub, söyüşlər söyə-söyə məni alçaldıb döyürdülər, başım kafelli divara dəyəndə gözlərim qaralıb sanki huşumu itirmiş kimi olurdum, ağır gövdəlilər kürəyimi, belimi o qədər əzmişdilər ki, artıq zərbələrə tab gətirə bilmirdim, nəfəsin sanki kəsilirdi, elə bilirdim ki, öləcəm, burdan sağ çıxmayacam... yekunda mən məcbur qalıb yalançı və qurama izahata imza atdım, əlavə də mənə yazdırdılar ki, “ifadəmi öxudum, öz sözlərimdən düzgün yazılıb, düzgünlüyünü öz imzamla təsdiq edirəm...” mən elə vəziyyətdə idim ki, artıq mənim üçün heç nəyin fərqi yox idi, nə aydın düşünə bilmirdim, nə də sağ qalmağıma ümidim yox idi...

İzahatım hazır olandan sonra mənə dövlət tərəfindən təyin edilmiş Məmmədov Hidayət adlı vəkilim gəldi, mənim döyülmüş, qan içində olmuş vəziyyətimi o da gördü, izahata imza atmaq istəmədi, bu an müstəntiq əsəbindən vəkilin üstünə şığıdı, xirtləyindən tutub divara dirədi, yumruğunu sifətinin qarşısında qıcayıb hədələdi ki, “...nətər yəni qol çəkmirsən? Çək sənə deyirəm!...” vəkil dedi ki, mənə hədə-qorxu gəlməyin imza atmayacağam, bu sözlərdən sonra mən sanki bir ümid işığı gördüm, lakin müstəntiq vəkildən əl çəkib kiməsə telefon zəngi etdi və dəstəyi vəkilə ötürdü, onu gördüm ki, vəkilim əli-ayağı əsə-əsə izahatıma və digər zəruri sənədlərə qol çəkdi getdi... ancaq bir fikir keçdi ağlımdan “vəssalam, məni yüklədilər, torbamı da tikdilər”...

Sonra məni Nizami Rayon Məhkəməsinə apardılar və barəmdə 4 ay həbs qətimkanı seçildi, daha sonra Gəncə 2 saylı İstintaq Təcridxanasına gətirdilər, oranın işçiləri məni və mənimlə birgə gələnləri döydülər, sonra karsa saldılar, 4 gün orda qaldıq, yalnız krantdan gələn suyu içirdik, 2 dəfə bizə eləcə çörək verdilər, ağrıdan onsuzda heç nə yeyə bilmirdim, iyul ayının 24-dü axşam saatlarında bizi karsdan çıxardılar və Bakı İstintaq Təcridxanasına göndərdilər. Saxlandığım 8 ay müddət ərzində nə ailəmlə əlaqə saxlaya və də görüşə bilməmişəm, görüş və telefon danışıqlarıma qadağa qoyulmuşdur, vəkilim də heç nə edə bilmirdi, cinayət materialları ilə yalnız istintaq bitəndən sonra (8 aydan sonra) tanış olmağa icazə verdilər, mən hansı maddələrlə ittiham olunduğumu yalnız 2 dəfə həbs qətimkanı sanksiyasını alanda bilmişəm, amma hansı əməllərimə görə bu ittihamlar mənə qarşı sürülüb bu günə kimi anlaya bilmirəm.

Həbs qərarı sanksiyasının artırılması ilə bağlı keçirilən məhkəmədə, boks deyilən yerdə, mənimlə birgə Şəmkirli oğlan var idi, onunla bir az söhbət etdik, o dedi ki, hadisəni törədən Rəşad Böyükkişiyev onun evində gizlənmişdir, Şəmkir rayonun Morul kəndində, və Rəşadı evdə sağ-salamat tutmuşdular, onu tutandan sonra mənim evə gəlməyimi gözləmişlər və mən evə girən kimi məni də tutdular, ondan sonra Rəşadı öldürdülər, adını da qoydular ki, güya silahlı müqavimət göstərib və s... bu eşitdiklərimdən sonra mən tam əminliklə anladın ki, bu Gəncə hadisəsinin hamısı başdan ayağa qurama bir işdir və bu işdə məni kimi sadəlöv insanlar qurban verildik. Xocalıda ermənilər millətimizə verdiyi zülmü mənə və tutulan bütün şəxslərə Nizami RPİ-də və digər yerlərdə verdilər, düşmən bizim başımıza belə oyun açanda bunu hardasa başa düşmək olar ki, bu düşməndir, amma özümüzünkülərin bizə qarşı belə qəddarlıq və vəhşilik etməsi bu heç bir ağıla məntiqə sığmayan haldır.

Bir ildən artıqdır ki, həbsdəyəm, heç nədən kimlərinsə çirkli siyasi oyununun qurbanına çevrilmişəm, 24 illik həyatımda görmədiyim çirkabları mən təcrid olunduğum yerlərdə görürəm. Bu yerlər məni fiziki və mənəvi olaraq məhv edir, mən hər günümdə psixoloji sarsıntı keçirirəm, əgər belə davam etsə sabahsı gün mən nə cəmiyyətimizə nə də anama layiqli oğul ola bilməyəcəm, bu çirkab mənu udacaq... anam gözümün önünə gəlir. Bir ildən çoxdur sən də iztirablar çəkirsən mənə görə, sənə dərd verdiyim üçün bağışla məni, belə olmasını istəməzdim...

2019-cu ilin mart ayının 14-dən mənim məhkəmə proseslərim başlayıb və bu günədək davam etməkdədir. İşim Gəncə Ağır Cinayətlər Məhkəməsində hakim Dadaş İmanovun icraatındadır, lakin məhkəmə iclasları hər həftə Bakı Sabunçu Rayon Məhkəməsində keçirilir, mənim valideynlərim Gəncə-Bakı-Gəncə yollarında qalıblar, iztirablar, mənəvi yorğunluq və maddi sıxıntılar yaşayırlar.

Mən haqqın və ədalətin sorağındayam".

25.07.2019-cu il

Rusiyada polis əməkdaşları qvardiyaçılarla birgə Moskvanın mərkəzində keçirilmiş icazəsiz aksiyada iştirak edən 1000 nəfərdən çox etirazçını saxlayıb.

Bu barədə paytaxt polisinin mətbuat xidməti məlumat yayıb.

“Paytaxtın mərkəzində icazəsiz aksiyada müxtəlif qanun pozuntularına görə 1074 nəfər saxlanılıb”, - məlumatda belə deyilir.

 Onlar barəsində lazımi akt tərtib olunacağı bildirilir. Polisin hesablamasına görə, aksiyada ümumilikdə 3500-dən çox adam toplaşıb.

Azərbaycanda bəzi işbazların əl atdığı “müdrik” bir metod var: bütün qeyri-qanuni işlərini Prezidentin və ailəsinin adıyla həyata keçirmək. Görünür, ölkə rəhbərliynin adının arxasında gizlənərək, törətdikləri qanunsuzluqların cəzasız qalacağına, heç kimin cınqırını çıxarmayacağına əmin olanlar öz şəxsi mənfəətləri üçün ölkə başçısının imicini korladıqlarını ya veclərinə almırlar, ya da oturduqları budağı kəsdiklərinin fərqində deyillər. Bir müddət əvvəl yaydığımız bir məlumatda “Yeni Həyat” Şirkətlər Qrupunun eyni metodla hərəkət etdiyi, bir vətəndaşın 5 hektar torpağını mənimsədiyi bildirilirdi.

(https://hurriyyet.org/xeber/yeni_heyatdan_sikayet_prezident_ailesinin_adindan_istifade_eden_sirket_eslinde_kimindir)

Daha sonra fermerlərə zay pomidor toxumu satan bir işbazın da məhsullarının I vitse-prezidentə aid şirkət tərəfindən istehsal olunduğunu bildirdiyi barədə şikayət məktubu almış və araşdırmalarımız nəticəsində məlum olmuşdu ki, həmin toxumu Almaniyanın məşhur “Bayer” şirkətlər qrupuna məxsus “Seminis” istehsal edibmiş. (http://ovqat.com/manset/28451-asan-a-qacmaq-aqrar-sektorda-innovativ-tdbirlr-deyilnd-bu-nzrd-tutulurmu.html)

Ovqat.com-un redaksiyasına daxil olan növbəti məktubdan isə belə anlaşılır ki, Prezidentin və ailəsinin adı arxasında gizlənib başqasının aldadanlar arasında icra başçıları da var. Bizə ünvanlanan məktubda konkret olaraq, Bakı şəhəri, Nizami rayon icra başçısı Arif Qasımovun adı hallanır.

Məktubda bildirildiyinə görə, rayonun bir məhəlləsində qeyri-yaşayış yerlərini söküb özününküləşdirən icra başçısı Leyla xanım Əliyevanın adından istifadə edirmiş. Sözü çox uzatmadan Malik Ağayev adlı Nizami rayon sakini tərəfindən qələmə alınan məktubu oxucuların və əlaqədar qurumların diqqətinə sunuruq: “Hörmətli Cənab Prezident, bildiyimiz kimi dünyanın istənilən ölkəsində dövlət gerbi, dövlət himni və dövlət bayrağı ölkələrin ən dəyərli, müqəddəs atributları sayılır. Dövlət bayrağı önündə baş əyirlər, dövlət himni səslənəndə ayağa qalxıb farağat dayanırlar.

Lakin mən deyərdim ki, ən böyük atribut elə atributları da icad edən Allah Taalanın bəxş etdiyi gödək ömür payını yaşayan insandır. Amma təəssüflə də olsa qeyd olunmalıdır ki, insan övladı bir çox hallarda məşəqqətlərə, haqsızlığa və zorakılıqlara məruz qalır. Zati-aliləri, ölkə başçısı olaraq Siz xalqımızın rahat, firavan və əmin-arxayın yaşaması naminə mümkün olduğundan da artıq işlər görürsünüz. Avropanın ən mütərəqqi yeniliklərini vətənimizə gətirir, uğurla tətbiq edirsiniz. Məmləkətimizin tərəqqisi, çiçəklənməsi naminə hər gün yeni bir uğura imza atırsınız. On beş illik prezidentliyiniz dövründə vətənimiz Azərbaycanda mübaliğəsiz demək mümkündür ki, yarım əsrə bərabər abadlıq-quruculuq işləri görülüb.

Tikilən çoxsaylı məktəblər, səhiyyə müəssisələri və digər sosial təyinatlı obyektlər insan qəlbini sanki riqqətə gətirir. Bu kimi xeyirxah işlərinizlə və əməllərinizlə öz adınızı qızıl hərflərlə Azərbaycan tarixinə yazaraq abidənizi ucaltmısınız. Ədalət naminə demək lazımdır ki, kadr siyasətinizdə də uğurlarınız danılmazdır. Lakin təyinatınızla kreslonuzda oturub nəcib siyasətinizə müqavimət göstərərək, ölkədə sosial gərginlik yaratmaq istəyən, narazıların sayını artırmaqla Sizinlə xalq arasında boşluq yaratmağa çalışan Nizami rayon İcra hakimiyyətinin başçısı kəmsavad Arif Qasımov kimi uğursuz kadrları da təəssüf hissi ilə də olsa qeyd etmək lazım gəlir.

Hörmətli Cənab Prezident, mən bir daha qeyd etməyi zəruri hesab edirəm ki, Nizami rayonunun R.Rüstəmov küçəsində yaşayıram. Qəpik-qəpik yığdığım və çox hissəsini də qohum-əqrəbadan borc aldığım pullar hesabına həyətimizdə özümə 21 kvadratmetr sahəni əhatə edən daşdan qeyri-yaşayış sahəsi inşa etdirmişdim, həm də “texpasport” və çıxarış almışdım.

Son aylar icra başçısı Arif Qasımov belə bir şaiyələr yaymağa başlamışdı ki, guya Leyla xanım Əliyevanın təşəbbüsü və layihəsi əsasında həyətimizdə mövcud olan bütün qarajlar götürüləcək, tikintilər söküləcək, yerində abadlıq-quruculuq işləri aparılacaq. Arif Qasımovun bu təxribat xarakterli çıxışları mənə də, qonşularıma da təəccüb təsiri bəxş edirdi və inandırıcı görünmürdü. Hər şeydən öncə ona görə ki, Leyla xanım prezident övladı olaraq heç zaman insanlara maddi ziyan vurmaz. Mən və qonşularım baş alıb gedən dedi-qodu ilə əlaqədar deyilənlərə aydınlıq gətirmək üçün dəfələrlə Arif Qasımovla görüşmək üçün onun iş yerinə getmişik. Lakin o nə məni, nə də qonşularımı bu günlərimizə qədər qəbul etmir. Nəhayət, iyun ayının 19-da mənə xəbərdarlıq edilmədən və qiymətli əşyalarımı götürməyə möhlət verilmədən mənə məxsus qeyri yaşayış sahəsi sökülmüşdür. Mənə nə az, nə də çox, düz 35000 manat maddi ziyan vurulmuşdur.

Cənab Prezident, İcra başçısının zorakılığını, rayon sakinləri ilə qeyri-insani davranışını görürsünüzmü? Arif Qasımov desin, görək, onun bu qeyri-sivil hərəkəti hansı normativ akta, hüquq normalarına söykənir?

O, qeyri-yaşayış sahəmi sökməklə məni intihar həddinə çatdırmışdır. Soruşmaq lazım gəlir ki, bəs mənə dəymiş maddi ziyanı kim ödəyəcək, Arif Qasımov?

Hörmətli Cənab Prezident, Siz keçirdiyiniz müşavirələrdə dəfələrlə özünüzü xalqın xidmətçisi elan etmisiniz. Amma əlinizlə çörək yeyən Arif Qasımov dolayısı yollarla özünü siyasi kursunuza qarşı qoyur, insanları üsyankarlığa sürükləyir.

Arif Qasımovdan soruşmaq istəyirəm: Niyə məni qəbul etmirsiniz?

Mənə vurduğunuz maddi ziyanı nə vaxt ödəyəcəksiniz?

Onu da nəzərinizə çatdırmaq istəyirəm ki, Arif müəllim vurduğunuz ziyanı ödəyənədək Sizinlə mübarizəm davam edəcək, fikirlərimi nüfuzlu saytlarda ictimailəşdirərək Sizi ifşa edəcəyəm!

Hörmətli Cənab Prezident, mənim bu şikayətimi xüsusi nəzarətə götürərək məsələnin dərindən araşdırılıb Sizə məlumat verilməsinə və mənə dəymiş ziyanın ödənilməsinə göstəriş verməyinizi xahiş edirəm.

İzn verin, dəyərli vaxtınızı alaraq verdiyim zəhmətə görə üzrxahlıq edim.

Əlaqə telefonu: (050) 215-51-51

Səmimi hörmətlə: Malik Ağayev”

Bakı Ağır Cinayətlər Məhkəməsində Azər Paşayevin sədrliyi ilə “Kaspi Liseyi ümumtəhsil məktəbi” MMC-də 564 min manatlıq mənimsəmə ilə bağlı növbəti məhkəmə prosesi keçirilib.

Prosesdə “Kaspi Liseyi”nin direktoru Elnur Əliyev şahid qismində dindirilib. Liseydə 564 min manatı mənimsəməsi ilə bağlı cinayət işi E.Əliyevin Daxili İşlər Nazirliyinin (DİN) Baş Mütəşəkkil Cinayətkarlıqla Mübarizə İdarəsinə müraciəti əsasında başlanıb. 

Şahid bildirib ki, liseyə 2018-ci ilin mart ayından rəhbərlik edir və təqsirləndirilən şəxs Tural Məmmədovun baş mühasib vəzifəsini icrasından razı deyildi. Onun sözlərinə görə, hesabatlar vaxtı-vaxtında verilmirdi, veriləndə isə səhv verilirdi. “Keçən ilin sentyabr ayında növbəti dəfə hesabat verilməyəndə mən Tural Məmmədov və digər təqsirləndirilən şəxs, mühasib Fərahim Möhbalıyevin işdən azad olunması ilə bağlı təsisçiyə müraciət etdim. Lakin o, həmişə Məmmədova həddindən artıq dəstək verirrdi və arxasında dururdu. Ona görə də bu dəfə məndən onları ofisə digər işə köçürməyi xahiş etdi. Mən onlardan kassanı təhvil alanda 400 min kəsir aşkar etdim. Növbəti gün kassa qəbzlərini sayanda kəsir məbləği bundan da artıq çıxdı. Komissiya yaradıldı. Məlum oldu ki, 560 min əksikdir. Məmmədov mənə dedi ki, təsisçi ilə təkbətək görüşmək istəyir. Görüşdə mən də iştirak etdim. Əvvəl Tural bildirdi ki, pulun bir hissəsini götürüb iş qurmaq istəyib, sonra isə əlində kağız gələrək and içdi ki, çatmayan 560 mini ödəyəcək. Mən onun sözlərinə inanmadım”.

Təqsirləndirilən Tural Məmmədov isə bildirib ki, liseyin təsisçisi olan Sona Vəliyeva ilə görüşəndə Əliyev yox idi. Həmin görüşdə Vəliyeva ona ərizə yazaraq, pulun götürülməsini öz üzərinə götürməsini dedi. Əks təqdirdə polisə müraciət edəcəyini bildirdi. “Həmin görüşdə siz yox idiniz. Mən Sona Vəliyevanın qol çəkdiyi daxili ödəniş qəbzlərini gətirdim. Onları niyə başqa ad ilə işə tikmisiniz?”, – deyə Məmmədov soruşub.

Daha sonra vəkil Elçin Sadıqov liseydə işçilərə verilən əməkhaqlarının 90%-ni nəğd şəkildə verilməsindən Əliyevin xəbəri olub-olmadığını soruşub. Əliyev suala cavab olaraq “mən direktor olandan sonra əməkhaqları bank vasitəsilə verilir”, deyib. Təqsirləndirilən şəxslər isə bildiriblər ki, maaşların nəğd şəkildə verilməsi barədə tapşırığı onlara rəhbərlik verib.

Tural Məmmədovun hər gün təsisçiyə pul verməsi barədə Əliyevin xəbəri olub-olmaması ilə bağlı suala E.Əliyev deyib: “Xeyr. Bu, mənə maraqlı olmayıb. Bir dənə onu bilirəm ki, təsisçi Turalı çox müdafiə edirdi. Fərahim isə günahsızdı. Onun tək günahı bu olub ki, cinayət haqqında bilib, xəbər verməmişdi”.

Daha sonra təqsirləndirilən şəxslər bildiriblər ki, onlardan 714 qəbz götürülüb və Əliyevdən qəbzlərin kassa mədaxil orderləri, yoxsa daxili ödəniş qəbzləri olduğunu soruşublar. Əliyev suala cavab verməyib. “Biz banklarla işləmək üçün, köçürmələri bank vasitəsilə aparmaq üçün 5 bankdan ibarət siyahını tərtib etdik. Lakin bu siyahı qəbul olunmayıb. Sona Vəliyeva deyib ki, “Paşa Bankla” işləyə bilmərik. Çünki pulumuz orada olsa, biz pulu Heydər Əliyev Fonduna köçürməli olacağıq”. Tural Məmmədov həmçinin əlavə edib ki, hər gün pulu Sona Vəliyevaya verirdi və həmin pulları Etibar Əliyevlə bir yerdə sayırdı. Əliyev isə “mən səninlə heç bir pul saymamışam”, deyə cavab verib.

Növbəti məhkəmə prosesi avqustun 2-nə təyin edildi.

Xatırladaq ki, ölkə prezidentinin köməkçisi Əli Həsənovun xanımı Sona Vəliyeva “Kaspi Liseyi” MMC-nin təsisçisidir. Cinayət işində onun da adı keçir və bu ad məhkəmədə bir neçə dəfə hallanıb.

İttihamda yazılıb ki, 2018-ci ilin aprel-oktyabr aylarında 454 nəfər şagirdin təhsili üçün 1 milyon 366 min manat pul ödənilib.

Bu vəsaitin 565 minini baş mühasib və mühasib sistemə daxil etməyib, birlikdə mənimsəyib. Adları çəkilən şəxslərə CM-in 179.4-cü (xüsusilə külli miqdarda ziyan vurmaqla mənimsəmə) maddəsi əsasında ittiham verilib.

Tural Məmmədov özünü qismən təqsirli bilərək deyir ki, pula ehtiyacı olduğundan vəsaitin bir hissəsini götürüb, amma məbləğ ittihamda yazıldığı kimi, 565 min olmayıb, rəqəm bundan iki dəfə azdır:

“Oktyabrın 16-da təsisçi Sona Vəliyeva məni xidməti otağına çağırıb, 565 mini götürüb-götürmədiyimi soruşdu. Dedim ki, təxminən 350 min götürmüşəm, liseydə araşdıranlar düz hesablamayıblar. Sona Vəliyeva dedi ki, əgər ona 565 minin hamısını özümün mənimsəməyim barədə ərizə yazıb versəm, polisə şikayət etməyəcək. Ona inanıb dediyi kimi izahat yazdım, pulu geri ödəmək üçün də 1 il möhlət verməsini xahiş etdim”.

Digər təqsirləndirilən Fərahim Möhbalıyevin onunla əlbir olmadığını deyən Tural Məmmədov deyir ki, pulun bir hissəsini şəxsi problemlərinin həllinə, qalanını da “Tatlı dünyası” şirniyyat evinin təmirinə xərcləyib.

Fərahim Möhbalıyev isə özünü təqsirli saymır.

Tural Məmmədov və Fərahim Möhbalıyevin təqsirləndirildiyi CM-in 179.4-cü maddəsində 10 ildən 14 ilədək həbs cəzası nəzərdə tutulub. (Turan.az)

Cəlilabad rayonunda bədbəxt hadisə baş verib.

1998-ci il təvəllüdlü yerli sakin Məmmədov Mürtəza Həsən oğlunu rayon ərazisində yerləşən ticarət mərkəzilərindən birində elektrik cərayanı vuraraq öldürüb.

Qeyd edək ki, mərhum hərbi xidmətdən yenicə qayıdıb.

Faktla bağlı araşdırma aparılır.

"Biz Rəşadın salamat qayıdacağından ümidimizi kəsmirik. Əlimiz Allahın ətəyində dua eləyirik...”

Bu sözləri hazırda axtarışda olan Azərbaycan Hərbi Hava Qüvvələrinin qəzaya uğrayan MiQ-29 təyyarəsinin pilotu Rəşad Atakişiyevin qayınanası Məhbubə Hüseynova News24.az-a danışarkən deyib.

O bildirib ki, Rəşad Atakişiyevi tanıyan hər kəs tezliklə ondan yaxşı xəbər alacağından inamını kəsmir:

"Könül çox pis vəziyyətdədir. Dərmanla sakitləşdiririk. Qulağı səsdə xəbər gözləyir. Danışanların ağzına baxır. Deyir, Rəşad sağ-salamat qayıdacaq, başqa heç bir xəbəri qəbul eləmirəm”.

Məhbubə Hüseynova onlara sosial şəbəkədə başsağlığı verilməsindən də çox üzüldüyünü bildirib:

"Rəşadın şəklinin altından başsağlığı yazırlar. Rəsmi xəbər yoxdur. Hələ axtarışlar gedir. Axı niyə başsağlığı verirsiz? Ona "Allah rəhmət eləsin” deməyə necə diliniz gəlir? Axı, mənim balam hələ yol gözləyir?”

Məhbubə xanım onların dərdinə şərik çıxan hər kəsdən dua gözləyir:

"Hamıdan Rəşad üçün dua istəyirəm. Uşaqları hər şeydən xəbərsizdir. Onları yaxınlarımızın birinin evinə aparmışıq ki, gəlib-gedəni görməsinlər, danışılanları eşitməsinlər. Amma böyük oğlu çox həssasdır. Deyir, atama nə olub? Məndən gizlətməyin...  Amma biz onu aldadırıq. Deyirik, atan başqa yerə döyüşə gedib, tezliklə qayıdacaq”.

Xatırladaq ki, iyulun 24-də saat 22.00 radələrində plana uyğun olaraq gecə vaxtı təlim-məşq uçuşları keçirən Hərbi Hava Qüvvələrinin MiQ-29 təyyarəsi ilə qəflətən rabitə əlaqəsi kəsilib və Rəşad Atakişiyevin idarə etdiyi aviasiya vasitəsi radarlardan itib. İlkin ehtimala görə, aviasiya qəzası nəticəsində hərbi təyyarə Xəzər dənizinə düşüb. Pilotun axtarışı və xilas edilməsi üçün təxirəsalınmaz tədbirlər həyata keçirilir. Müdafiə nazirinin tapşırığına əsasən, yaradılan komissiya qəzanın səbəblərinin araşdırır. 

Bir neçə gün öncə Almaniyanın Münhen şəhəri ərazisində yerləşən Hitler Almaniyası dövründәki əsir toplama kampında oldum.(ölüm düşərgəsində ) Orda gördüyüm faktlar məni dəhşətə gətirdi. Öldürülən əsirlərin böyük əksəriyyəti yəhudilər və sovet ordusunun əsirləri olub. Ordakı mənzərə çox vahiməli idi, sanki öldürülənlərin ruhu gəzirdi düşərgədə.Düşərgədəki qaz kameraları , öldürülən əsirləri yandırmaq üçün istifadə olunan sobaları gördükdə Hitlerin bəşəriyyətin üz qarası olduğunun bir daha fərqinə vardım. Deyərdim ki, Çingizxandan sonra ən qəddar adam elə Adolf Hitler olub. Hər il düşərgəyə dünyanın müxtəlif ölkələrindən tarixin eyibi ilə tanış olmaq üçün xeyli turist gəlir.

Mənim diqqətimi çəkən isə almanların yeni nәsli öz keçmiş eyibləri ilə tanış etmәsidir. Bir qrup məktəbliləri Hitler Almaniyasının cinayətləri ilə tanış olmaq üçün düşərgəyə gətirmişdilər.Müəllim o qədər obyektiv danışırdı ki, heyrətə gəldim və öz-özümə dedim: İlahi bu xalq necə də ali xalqdır ki, öz eybini qәbul etmәyi bacarır. Müəllim şagirdlərə müharibəni pisləyir, sülhün bəşəriyyətə faydalarından danışırdı.

Hardan hara... Nasist Almaniyasından Demokratik Almaniyaya çevrilən Almaniya.

Hal-hazırda Almaniya Federativ Respublikası 1 milyondan çox qaçqına qucaq açıb himayə edir və əhalinin bir çoxu da qaçqınlara isti münasibət bəsləyir.Son zamanlarda sağçı qrupların çoxalmasına səbəb gələn miqrantların törətdiyi cinayətllərdir.

Zakir Ağayev, Almaniyad yaşayan siyasi mühacir

Son günlər Avropaya hicrət edən azərbaycanlılara saxta sənəd satılması və bu kimi qanunsuz hallarla bağlı müzakirələr aparılır, qarşılıqlı ittihamlar səsləndirilir. Müsavat partiyasının Avropa Nümayəndəliyi Nəzarət Təftiş Komissiyasının keçmiş sədri, tanınmış jurnalist Yafəz Əkrəmoğlu facebook səhifəsində mövzuya uyğun və ictimaiyyət üçün maraq doğura biləcək status paylaşıb.  Xeberinfo.de  Y.Əkrəmoğlunun statusunu olduğu kimi təqdim edir: 

"Tәqdim olunan partiya bileti vә arayış sizin şikayәtin tәmin olunması üçün uyğun deyil. Artıq diqqәtә alınması vacibdir ki, partiya funksionerlәrinin müsbәt fәaliyyәtlә bağlı tәsdiq arayışlarını Azәrbaycanda әldә etmәk çox da çәtin deyil".

Almaniya, Münster şәhәr mәhkәmәsinin müsavatçı Rahid Besirov haqda çxardığı neqativ qәrarda Müsavat Partiyası vәsiqә vә arayışlarına münasibәt bu cür tәqdim olunub. Rahid Bәşirov Miqrasiya idarәsinin onun haqda çıxardığı mәnfi qәrardan mәhkәmәyә şikayәt etmişdi.

Mәhkәmә yazır ki, Almaniya Xarici İşlәr Nazirliyinin 22 fevfal 2019-cu il tarixli, "Azәrbaycan: mühacirlik vә deportasiya işlәri üzrә..." adlı sәnәdinә istinad edәrәk belә hesab edir .

Rahid Bәsirov 1999-cu ildәn Müsavat Partiyasının üzvüdür. O partiya gәnclәr tәşkilatının sәdr müavini olub. Müxtәlif vaxtlarda hakimiyyәtin tәzyiqlәrinә mәruz qalıb, sutkalıq hәbs dә olunub. 2015-ci ildә NİDA-dan deputatlığa namizәdliyi irәli sürülsә dә MSK qәbul etmәyib.

Müsavat Partiyasının onun tәzyiqlә üzlәşmәsilә bağlı verdiyi arayış әslindә fәaliyyәtinә uyğun gәlir. Bәs onda niyә Mәhkәmә bu arayışı inandırıcı saymayıb?

Qurunun oduna yaş da yanır?

Qәrardan vә Almaniya Xarici İşlәr Nazirliyinin partiyaya aid olan arayış vә vәsiqәlәr haqda mәlumatından belә çıxır ki, onlar indiyә kimi verilәn arayışlar haqda adaşdırmalar apardıqdan sonda bu nәticәyә gәliblәr. Yәni o boyda nazirlik durub havadan belә nәticәyә gәlmәyib. Onlar vәsiqә vә arayışları saxta saymır, lakin arayışda yazılanları ciddiyә alıb, hәqiqәtә uyğun hesab etmirlәr.

Nazirliyin bu sәnәdi artıq partiyanın bütün arayışlarına münasibәtdә tәtbiq oluna bilәr. Yәni mәhkәmә, yaxud miqrasiya idarәsi istәnilәn arayış haqda yoxlama aparmadan belә, bu sәnәdә әsaslanıb bütün müsavatçılara eyni münasibәti sәrgilәyә bilәr. Son zamanlar Almaniyada azәrbaycanlı siyasi mühacurlәrә soyuq münasibәtin fonunda belә görsәnir ki, elә ucdantutma bu sәnәdә әsaslanıb arayışların әksәriyyәtini hәqiqәtә uyğun saymayacaqlar.( 8-10 il әvvәl isә heç tәzyiqә mәruz qalmağı sübut etmәyә belә ehtiyac yox idi. Partiya vәsiqәsini göstәrmәk bәs edirdi).

Artıq Almaniyadakı Müsavat partiyası üzvlәrinin çoxuna vәsiqә vә arayışlarının hәqiqәti әks etdirmәdiyi haqda qәrar vә bildiriş göndәrilib. Mәn dә oxumuşam onları. Çoxu uzun illәrin müsavatçılarıdı. Ancaq, әksәriyyәt bu qәrarların yayılmasını istәmir.

Bu mәlumatı Rahid Bәşirovun öz istәyini nәzәrә alıb paylaşıram. Sәnәdi özüm oxumuşam. Sәnәdi görmәk istәyәnlәr Rahid bәyin özünә müraciәt edә bilәrlәr. Yәqin ki, kimә mәslәhәt bilsә, göndәrәr.

Bu statusla onu çatdırmaq istәyirәm ki, aldanıb siyasi mühacir kimi Avropaya gәlmәyin. Gәlirsizsә özünüzlә daha tutarlı faktlar gәtirmәlisiniz.

Bazar ertəsi, 22 İyul 2019 03:56

Bu gün Milli Mətbuat Günüdür

Yazan

Bu gün Azərbaycan milli mətbuatının yaranmasından 144 il ötür

APA-nın məlumatına görə, ölkədə ilk mətbu orqanın – əsası Həsən bəy Zərdabi tərəfindən qoyulmuş “Əkinçi” qəzetinin nəşrə başladığı 22 iyul tarixi 1991-ci ildən Azərbaycanda Milli Mətbuat günü kimi qeyd olunur.

“Əkinçi”nin 1875-ci il iyulun 22-dən 1877-ci ilin sentyabrınadək cəmi 56 sayı işıq üzü görsə də, onun Azərbaycan milli mətbuatının təşəkkül tapmasında, inkişafında əvəzsiz rolu olub. Əsasən maarifçilik missiyasını üzərinə götürmüş “Əkinçi” az müddətdə həm ziyalı təbəqə, həm də sadə insanlar arasında çox məşhurlaşıb. Təsadüfi deyil ki, dövrünün görkəmli ziyalıları və qələm sahibləri qəzetlə əməkdaşlıq edib, müntəzəm məqalələrlə çıxış edibilər. Lakin “Əkinçi”nin ömrü uzun sürməyib. Çar Rusiyası qəzetin insanların maariflənməsində, ictimai-siyasi proseslərə daha yaxından bələd olmasındakı rolundan çəkinməyə başlayıb və sonda qəzetin nəşrini dayandırıb.

O vaxtdan müxtəlif tənəzzül və intibah dövrləri keçən Azərbaycan mətbuatı daim cəmiyyətin proseslərə baxışını əks etdirən güzgü rolunu oynayıb. 1998-ci ilin avqustunda senzuranın ləğvi isə Azərbaycanda mətbuatın inkişafına ciddi təkan verib.

Hazırda respublikada çoxlu sayda müxtəlif qəzet və jurnallar nəşr olunur, internet qəzetçilik inkişaf edir. Müasir dövrdə informasiya texnologiyalarının inkişafı Azərbaycan mətbuatını qlobal informasiya şəbəkəsinin bir hissəsinə çevirib. Bütün dünyada gedən qloballaşma prosesi mətbuatdan da yan ötməyib. Bu gün yüzlərlə jurnalist beynəlxalq təşkilatların dəstəyi ilə təşkil olunan peşə artımı kurslarında treninq və təkmilləşmə kursları keçirlər.

Azərbaycanda Mətbuat Şurasının formalaşması media sahəsində pərakəndəliyi aradan qaldırmağa müvəffəq olub, Jurnalistlərin Peşə Kodeksinin yaradılması isə media qurumları arasında problemlərin həllinə müsbət təsir göstərib.

Azərbaycan Prezidenti Heydər Əliyevin 1998-ci il 16 avqust tarixli "Azərbaycan Respublikasında söz, düşüncə və informasiya azadlığının təmin edilməsi tədbirləri haqqında" fərmanı ilə ölkədə kütləvi informasiya vasitələri üzərində senzura ləğv edilib. Bu fərman kütləvi informasiya vasitələrinin sürətli inkişafına ciddi təkan verməklə yanaşı, onların rasionallığının artırılması sahəsində geniş Dövlət Proqramının əsas istiqamətlərini müəyyən edib.

Azərbaycan Prezidenti İlham Əliyevin 2009-cu ilin martın sonunda imzaladığı sərəncamla Prezident yanında Kütləvi İnformasiya Vasitələrinə Dövlət Dəstəyi Fondu yaradılıb. Fondun yaradılmasında məqsəd Azərbaycanda fikir, söz və məlumat azadlığı şəraitini yaxşılaşdırmaq, o cümlədən buna xidmət edən kütləvi informasiya vasitələrinə dövlət dəstəyidir.

Milli mətbuatın yubileylərinin ölkədə geniş qeyd olunması, KİV-lərə birdəfəlik yardımların göstərilməsi, mətbuat işçilərinin sosial müdafiəsinin gücləndirilməsi tədbirləri, həmçinin milli mətbuatın inkişafındakı xidmətlərinə görə jurnalistlərin fəxri adlarla təltif edilməsi haqqında sərəncamlar da mətbuata və mətbuat işçilərinə qayğının tərkib hissəsidir.

Dövlət başçısının Azərbaycan mətbuat işçilərinin sosial müdafiəsinin gücləndirilməsinə dair sərəncamları əsasında jurnalistlər üçün iki yaşayış binası tikilib. 2013-cü və 2017-ci illərdə Prezident İlham Əliyev jurnalistlər üçün tikilmiş binada Milli Mətbuat Günü münasibətilə mənzillərin paylanması mərasimində iştirak edib. Dövlət başçısı 2017-ci ildə mətbuat işçiləri üçün sayca üçüncü yaşayış binasının tikintisi ilə bağlı sərəncam imzalayıb.

Azərbaycan Konstitusiyasında söz və mətbuat azadlığının təməl prinsip olaraq əksini tapması ölkədə medianın azad və güclü bir cəmiyyət institutu kimi formalaşmasına təkan verib. Sözsüz ki, bütün bu proseslərin əsas iştirakçıları, əldə olunan nəticələrin əsas səbəbkarları Azərbaycan jurnalistləridir.

Bu gün peşə bayramını qeyd edən bütün həmkarlarımızı "APA Group" kollektivi adından təbrik edir, fəaliyyətlərində uğurlar diləyirik.

Bazar, 21 İyul 2019 01:01

Trola ciddi suallar ünvanlanmaz

Yazan

İki ay əvvəl olardı. Müsavatçı (bir zaman yüksək post tutub) bir dostumla Azərbaycanda siyasi məhbus mövzusunda danışırdıq. Söhbət Tofiq Yaqubludan düşdü. Müsavatçı dostum dedi ki, Tofiq Yaqublu qorxmaz və çox cəsarətli adamdı, hakimiyyətə qarşı sərt döyüşür. Amma Əli Kərimlinin troludur. 
Tofiq bəy haqqında dediklərinin birinci hissəsini qəbul etdim, ikinci hissəsi məni çoox təəccübləndirdi, Müsavat Partiyasında Divan üzvü olduğunu bildirdim. Adam daha iddialı danışdı...
Bir neçə gün əvvəl xidmətdə olan əsgərimizin əlindən silahının alınması ölkəmiz üçün böyük biabırçılıq oldu və hələ də hökumət adekvat cavab verməyib. Bu zaman Tofiq Yaqublu İranın Bakıdakı səfirliyi qarşısında peyda oldu. Xəbərin başlığını oxuyanda inanmadım. Çünki, Tofiq bəy həmin gəncləri götürüb, Gürcüstan səfirliyinin qarşısına getməliydi. Əlqərəz, sonra məlum oldu ki, İran Ermənistanla silah istehsalını təkzib edib və edir. Deməli, Tofiq bəy dəqiqləşdirmədiyi məlumata görə qonşu ölkənin səfirliyinə hücum edib. (Niyə Tofiq bəyin adını qeyd edirəm, axı orda başqaları da olub? Tofiq bəyin yaşı və təcrübəsi belə davranışla düzmütənasib olmadığı üçün). 
Bəli, lap elə hücum, yaxud basqın etmişdilər. Əsasım; Bakıda yeganə səfirlik İranındır ki, kim istəsə əlinə bir şüar tutub qapısının ağzını kəsdirə bilir. Bu dəfə basqın olduğu üçün polis risk eləmədi, Tofiq bəyin bandasının qarşısını aldı. 
Müvasatçı dostumun dediyi, görüntülərə baxanda bir də yadıma düşdü. Tofiq bəyin trol olduğuna inanmağa başladım. Həm də Ata Abdullayevin Əli Kərimliyə qarşı məlum hərəkətini xatırladım, bir az boy fərqi olmasaydı deyərdim, elə eyni davranışdır. 
İllərdir hörmətli Tofiq bəyə ünvanlamaq istədiyim bəzi suallar da var idi. Daha ehtiyac qalmadı, trola ciddi suallar ünvanlanmaz! Sonda deyim ki, hörmətli Əli bəyin trolu olduğuna hələ də inanmıram.

Cavid Cabbarlı

4 -dən səhifə 227

Günün videosu